រាជធានីភ្នំពេញ ៖ មានហេតុការណ៍គ្រោះថ្នាក់ចរាចរណ៍មួយបានកើតឡើង កាលពីវេលាម៉ោង ៣និង ០០នាទីយប់រំលងអធ្រាត្រឈានចូលថ្ងៃទី២៤ ខែកញ្ញា ឆ្នាំ២០១៣ ដែលបង្កឡើងដោយម៉ូតូម៉ាកឃ្លីកមួយ គ្រឿងជិះគ្នា៣នាក់ បានជ្រុលទៅបុកម៉ូតូម៉ាកសង់កូរ៉េមួយគ្រឿងនៅចំណុចផ្លូវលេខ២៧១ កែងផ្លូវ១៨២ ស្ថិតក្នុងសង្កាត់ទឹកល្អក់ទី២ ខណ្ឌទួលគោក បណ្តាលឲ្យយុវជនទាំង៣នាក់រងរបួសធ្ងន់។
បើតាមប្រភពព័ត៌មានពីសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញ យុវជន ៣នាក់ បានជិះម៉ូតូម៉ាកឃ្លីក ពណ៌ខ្មៅ ១គ្រឿង ពាក់ស្លាកលេខ ភ្នំពេញ 1BM-6411 ក្នុងស្ថានភាពស្រវឹងជោកជាំ ក្នុងទិសដៅពីត្បូងទៅជើង ធ្វើដំណើរតាមបណ្តោយផ្លូវលេខ២៧១។ ខណៈពេលជិះមកដល់ចំណុចកែងផ្លូវ១៨២ ស្រាប់តែម៉ូតូជ្រុលចង្កូតទៅបុកម៉ូតូសង់កូរ៉េ ពណ៌ក្រហម ១គ្រឿង ដែលម្ចាស់គេចតទុកមុខផ្ទះ បណ្តាលឲ្យម៉ូតូទាំង ២គ្រឿង គាបជាប់គ្នាធ្លាក់ចូលប្រឡោះច្រកចូលផ្ទះតែម្តង ។
បន្ទាប់ពីកើតហេតុ កម្លាំងសមត្ថកិច្ចមូលដ្ឋានបានចុះទៅអន្តរាគមន៍ ដោយបានទំនាក់ទំនងហៅរថយន្តសាម៊ុយមកដឹកយកអ្នករបួសទៅធ្វើការសង្គ្រោះបន្ទាន់នៅមន្ទីរពេទ្យព្រះកុសុមៈ ហៅពេទ្យលោកសង្ឃ។ ចំណែកម៉ូតូទាំង២គ្រឿង ត្រូវបានសមត្ថកិច្ចយកទៅរក្សាទុកជាបណ្តោះអាសន្ន ដើម្បីរង់ចាំធ្វើការដោះស្រាយនៅពេលក្រោយ៕
