រាជធានីភ្នំពេញ ៖ ម៉ូតូ២គ្រឿង បានបើកបុកពេញទំហឹងលាន់ស្នូរដូចរន្ទះ នៅចំណុចលើស្ពានអកាស៧មករា កាលពីវេលាម៉ោង ៩និង៥០នាទី យប់ថ្ងៃទី២៣ ខែកញ្ញា ឆ្នាំ២០១៣ ស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ បណ្តាលឲ្យមនុស្ស៣នាក់រងរបួសធ្ងន់ធ្ងរ។
បើតាមសេចក្តីរាយការណ៍ពីកន្លែងកើតហេតុបានឲ្យដឹងថា ហេតុការណ៍នេះបង្កឡើងដោយ ម៉ូតូម៉ាកC125 ស៊េរី២០១២ ពណ៌ខ្មៅ ១គ្រឿង ពាក់ស្លាកលេខ ភ្នំពេញ 1BH-7671 ជិះឌុបគ្នា ២នាក់ ប្តីប្រពន្ធ ធ្វើដំណើរតាមបណ្តោយផ្លូវកម្ពុជាក្រោម ក្នុងទិសដៅពីកើតទៅលិចឡើង លើស្ពានអាកាស៧មករា ដោយបើកបរឡើងបញ្ច្រាសស្ពាន។ ខណៈពេលជិះឡើងមកដល់លើស្ពាន ស្រាប់តែបានវ៉ាកនឹងម៉ូតូមួយគ្រឿងទៀត ម៉ាក C125 ស៊េរី២០០៧ ពណ៌ខ្មៅ ពាក់ស្លាកលេខ ភ្នំពេញ 1M-9625 ជិះដោយបុរសម្នាក់ ដែលធ្វើដំណើរពីលិចទៅកើត បណ្តាលឲ្យបុកគ្នាពេញទំហឹង ធ្វើឲ្យអ្នកទាំងបីរងរបួសធ្ងន់ ។
បន្ទាប់ពីកើតហេតុ កម្លាំងសមត្ថកិច្ចមូលដ្ឋានក៏បានចុះទៅអន្តរាគមន៍ ដើម្បីធ្វើការវាស់វែង និងបានបញ្ជូនអ្នករបួសទៅធ្វើការសង្គ្រោះនៅមន្ទីរពេទ្យ។ ចំណែកវត្ថុតាងម៉ូតូទាំង២គ្រឿង ត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីរង់ចាំធ្វើការសោះស្រាយនៅពេលក្រោយ៕
