ភ្នំពេញ: ផ្ទះប្រជាពលរដ្ឋ៤ខ្នង ត្រូវបានភ្លើងឆាបឆេះម៉ត់ ធ្វើឲ្យមានការភ្ញាក់ផ្អើលដល់ប្រជាពលរដ្ធជាច្រើននៅក្បែរកន្លែងកើតហេតុ និងសមត្ថកិច្ចមូលដ្ឋាន វេលាម៉ោងជាង ៨ យប់ថ្ងៃទី២៥ ខែតុលា ឆ្នាំ២០១៣ នៅចំណុចផ្ទះលេខ៣២៨ ភូមិព្រែកទាល់ សង្កាត់ស្ទឹងមានជ័យ ខណ្ឌមានជ័យ។
ស្រីវ័យចំណាស់ជាម្ចាស់ផ្ទះ ឈ្មោះ យ៉ុង ស្រីមុំ បាននិយាយប្រាប់សមត្ថកិច្ចមូលដ្ឋានថា ដំបូងឡើយភ្លើងបានចេញពីផ្ទះរបស់ខ្ញុំ ប៉ុន្តែដោយសារតែផ្លូវចូលវាមានលក្ខណៈតូចចង្អៀត ពិបាករថយន្តពន្លត់អគ្គិភ័យចូល ក្នុងការជួយអន្តរាគមន៍ បាញ់ពន្លត់ឲ្យបានទាន់ពេលវេលា ហើយបានឆេះរាលដាលដល់ផ្ទះអ្នកដទៃអស់ចំនួន៣ខ្នងថែមទៀត។
យ៉ុង ស្រីមុំ បាននិយាយថា មុនពេលកើតហេតុ ក្រុមគ្រួសាររបស់ជនរងគ្រោះទាំងអស់ បាននៅក្នុងផ្ទះទាំងអស់គ្នាប៉ែកខាងក្រោម តែបន្តិចក្រោយមកក៏ស្រាប់តែមានអគ្គិភ័យមួយបានឆាបឆេះឡើង យ៉ាងសន្ធោសន្ធៅនៅផ្ទះប៉ែកខាងលើ ដែលសង់អំពីឈឺប្រក់សង្ក័សី ថ្មខាងក្រោម ដែលមានទំហំ ៥ គុណ និង ៨ ម៉ែត្រ បានធ្វើឲ្យមានការភ្ញាក់ផ្អើលដល់ប្រជាពលរដ្ឋជាច្រើន និងអ្នកនៅក្បែរកន្លែងកើតហេតុ និងសមត្ថកិច្ចមូលដ្ឋាន ហើយក៏មានការអន្តរាគមន៍ពីសមត្ថកិច្ចរថយន្តអគ្គិភ័យ បានជួយបាញ់ពន្លត់ តែត្រូវបានភ្លើងឆេះម៉ត់ទាំងស្រុងទៅហើយ។
តាមការសនិ្នដ្ឋានរបស់សមត្ថកិច្ចជាជំហ៊ានដំបូង គឺបណ្តាលមកពីការទុស្សេខ្សែភ្លើង៕
ប្រភពពី៖ www.khmer-note.com
