ភ្នំពេញ : មិនដូចកាលពីនៅក្នុងស្រុកគ្រាដែលនាងទៅចូលរួមកម្មវិធីអាណាចក្រតារាឡើយ បើទោះជាស្ថិតក្នុងសម្លៀកបំពាក់រ៉ូបក្រហមឆើតដដែលក៏ដោយ ក៏តារាមេម៉ាយចាយសម្រស់បែបយេៗធ្មេញច្រពើសកំពុងផ្ញើប្រាណលើដែនកោះអូស្រ្តាលីនាងឆយី ហាក់បន្ថយនូវភាពសិចស៊ីផ្ទុយពីតារាស្រីៗមួយចំនួនដែលឲ្យតែបានឱកាសចេញសម្តែងឯនាយសមុទ្រ យកថ្នាលនេះបញ្ចេញសាច់ស្ទើរតែអាក្រាតកាយក៏មានដើម្បីបន្ថែមនូវភាពទាក់ទាញ។
បន្ទាប់ពីទទួលឱកាសទៅស្រាយសម្ពាយក្បាច់គុនសិល្បៈនៅលើដែនកោះអូស្រ្តាលី ក្រោយពីអវត្តមានពីវិថីសិល្បៈជិតកន្លះទសវត្សរ៍ស្រីស្រស់ឆយី ដែលរងការរិះគន់យ៉ាងចាស់ដៃពីមហាជនដោយសារតែការសម្ញែងដើមទ្រូងននលគកនៅថ្ងៃចូលរួមកម្មវិធីអាណាចក្រតារាទើបតែបានបង្ហោះរូបភាពជាច្រើនសន្លឹកពីដែនដីប្រទេសស៊ីវិល័យនោះ ដោយមានទាំងរូបភាពសម្តែងនិងរូបភាពដើរកម្សាន្ត។
ជាមួយរូបថតជាច្រើនសន្លឹកដែលនាងបានបង្ហោះនោះ ត្រូវបានមហាជននិយមលេងហ្វេសប៊ុកចាប់អារម្មណ៍ទៅជាពិសេសរូបដែលនាងគ្រងឈុតរ៉ូបពណ៌ក្រហមវែង ដែលគេស្គាល់យ៉ាងច្បាស់ថា ជារ៉ូបនាងស្លៀកមកចូលរួមកម្មវិធីអាណាចក្រតារា ដែលធ្លាប់បំផុសការរិះគន់ធ្ងន់ៗព្រោះតែរ៉ូបនោះសឹងតែគ្មានបិទបាំងសុដន់ទាល់តែសោះ។
ប៉ុន្តែដោយឡែកការស្លៀកពាក់នៅទីនោះ រ៉ូបដដែលនោះមិនបានបញ្ចេញសាច់ននលគកដូចដែលនៅស្រុកខ្មែរនោះឡើយដែលជាដើមហេតុក្លាយជាប្រធានបទជជែកវែកញែករបស់ក្រុមអ្នកនិយមតាមដានសកម្មភាពសិល្បៈក្នុងប្រព័ន្ធហ្វេសប៊ុក និងនាំជជែកវែកញែកគ្នាដោយមួយចំនួនលើកឡើងថា៖ «បើខ្ញុំចាំមិនភ្លេចទេ រ៉ូបពណ៌ក្រហមនោះ គឺជារ៉ូបដែលនាងស្លៀកទៅចូលរួមកម្មវិធីអាណាចក្រតារា ដែលបញ្ចេញភាពសិចស៊ីបំផុតនោះហើយ តែពេលនេះរ៉ូបដដែលនេះបែរជាមិនសូវជាសិចស៊ីឃើញកេរ្តិ៍ដើមទ្រូងដូចថ្ងៃនោះទេ»។
ជាមួយគ្នានោះក៏មានអ្នកខ្លះទៀតបញ្ចេញមតិសរសេរតបថា៖ «ត្រូវហើយរ៉ូបតែមួយហ្នឹងប៉ុន្តែមិនមើលទេ កាលពីនាងស្លៀកស្រុកខ្មែរនោះនាងមានចេតនាឲ្យសិចស៊ី នាងទម្លាក់ស្មារ៉ូបទាំងសងខាងចុះតែលើកនេះនាងមិនបានធ្វើដូចមុនឡើយ»។
អ្នកខ្លះទៀតសរសេរថា៖ «ទំនងជានាងខ្លាចបាត់បង់ឱកាសការងារពីសិល្បៈដូចនាង ឆៃលី ដាឡែន ហើយមើលទៅបានជានាងមិនហ៊ានសិចស៊ីដូចកាលពីមុនទៀតនោះ»។
បើទោះជាមានការជជែកវែកញែកយ៉ាងដូច្នេះក្តី ក៏មានអ្នកខ្លះនៅតែទទួលស្គាល់ការស្លៀកពាក់របស់នាងនោះថាសិចស៊ីដដែលដោយពួកគេលើកឡើងយ៉ាងដូច្នេះថា៖ «មិនចាំបាច់និយាយច្រើនទេ ទោះជាស្លៀកអ៊ីចឹងក៏ជាការស្លៀកពាក់សិចស៊ីហើយ ដោយគ្រាន់តែនាងមិនហ៊ានឲ្យដូចមុនមិនមើលទេអី ចេញផ្លែល្ហុងដូចតែគ្នាហ្នឹង»។
ជាមួយគ្នានោះក៏មានប្រិយមិត្តលេងហ្វេសប៊ុកខ្លះបង្ហាញទស្សនៈអភិរក្សឡើងដោយចោទជាចម្ងល់បែបចំអកផងថា៖ «ម៉េចបានជាតារាស្រីនៅស្រុកខ្មែរមួយចំនួនមកបំផ្លាញប្រពៃណីខ្មែរអ៊ីចឹង! បើនាំគ្នាធ្វើអ៊ីចឹងកុំនាំគ្នាថាជានារីខ្មែរ! ខ្ញុំខ្ពើមខ្លាំងណាស់!»។
ប្រតិកម្មទៅនឹងក្រុមអ្នកយកដើមទ្រូងនាងធ្វើជាប្រធានបទជជែកគ្នានោះ ស្រីស្រស់សម្រស់យេៗដែលទើបប្រកាសខ្លួនក្តែងៗ បោះទុនរាប់ម៉ឺនដុល្លារ បើកជំនួញថ្មី ក្រោយការរិះគន់រឿងសិចស៊ីនៅកោះពេជ្រ នាង ឆយី មិនបានសរសេរតបវែងឆ្ងាយនោះឡើយ។
តារាស្រីធ្មេញច្រពើសញញឹមស្រស់រូបនេះបានត្រឹមតែសរសេរថា៖ «តែខ្ញុំចង់ឲ្យអ្នកទាំងអស់គ្នាសាកយកសម្ដីដែលរិះគន់ទាំងអស់ដែលបាននិយាយមកកាន់ខ្ញុំយកទៅគិតមើលថាសម្ដីទាំងអស់នេះជាសម្ដីអ្នកដែលមានក្រមសីលធម៌ ដែលគិតថាខ្លួនឯងជាមនុស្សថ្លៃថ្នូរក្នុងសង្គមហើយប្រើសម្ដីអមនុស្សបែបនេះមកលើខ្ញុំទោះយ៉ាងណា ខ្ញុំក៏ជាមនុស្សម្នាក់រស់ក្នុងលោកនេះជាមួយអ្នកទាំងអស់គ្នាដែរ»៕
