រាជធានីភ្នំពេញ ៖ យុវជនម្នាក់ក្នុងចំណោមពីរនាក់ ត្រូវរថយន្តកុងតឺន័រ កិនមួយកំណាត់ខ្លួន បែកក្បាលធ្លាយខួរស្លាប់ភ្លាមៗ បន្ទាប់ពីពួកគេជិះម៉ូតូស្កុបពី នៅតាមបណ្តោយផ្លូវជាតិលេខ២ ពីក្រុងតាខ្មៅ លុះមកដល់ ចំណុចក្បែរវត្តចាក់អង្រែលើ ស្ថិតក្នុងភូមិទួលរកា សង្កាត់ចាក់អង្រែលើ ខណ្ឌមានជ័យ ក៏បានប៉ះជាមួយ រថយន្តកុងតឺន័រ បណ្តាលឲ្យយុវជនម្នាក់ ដែលជិះពីក្រោយ ធ្លាក់ចូលក្រោមរថយន្ត កិនបែកក្បាលធ្លាយខួរស្លាប់ភ្លាមៗ ចំណែកអ្នកបើកបររងរបួសស្រាល កាលពីពីវេលាម៉ោង ៦និង២០នាទី ល្ងាចថ្ងៃទី២៦ ខែតុលា ឆ្នាំ២០១៣ ។
សពជនរងគ្រោះមានឈ្មោះ គង់ វណ្ណី ភេទប្រុស អាយុ ៣២ឆ្នាំ មានទីលំនៅក្នុងសង្កាត់បឹងត្របែក ខណ្ឌចំការមន បើកបរម៉ូតូម៉ាក ស្កូពី ពណ៌ស ពាក់ស្លាកលេខ ភ្នំពេញ 1AP-3004។ មុនពេលកើតហេតុ គេឃើញជនរងគ្រោះ បើកម៉ូតូម៉ាកស្កូពី ជិះគ្នាពីរនាក់តាមបណ្ដោយ ផ្លូវជាតិលេខ២ ក្នុងទិសដៅពីតាខ្មៅមកភ្នំពេញ។ ភ្លាមៗនោះមានរថយន្តមួយគ្រឿង សណ្ដោងកុងតឺន័រ បានបើកស្របទិសជាមួយម៉ូតូ បានជ្រុលចង្កូតមកបុកហើយកិន ជនរងគ្រោះពីលើកៀបជាប់ជាប់ នឹងកង់រថយន្តខាងក្រោយ ខ្ទេចមួយកំណាត់ខ្លួនស្លាប់ភ្លាមៗ។
នៅមុនពេលមានគ្រោះថ្នាក់នេះ ជនរងគ្រោះរួមនឹងមិត្តភក្ដិ បានធ្វើដំណើរត្រឡប់មកពី ដើរលេងនៅក្រុងតាខ្មៅ ក្នុងបំណងមកលំនៅដ្ឋានវិញ នៅសង្កាត់បឹងត្របែកក៏បានជួប ហេតុការណ៍អាក្រក់នេះតែម្ដង ហើយមិត្តភក្តិបានជូនដំណឹង ទៅប្រពន្ធជនរងគ្រោះ និងគ្រួសារមកយកសពទៅធ្វើបុណ្យ តាមប្រពៃណី។ ចំណែកអ្នកបើកបររថយន្ត កុងតឺន័រ បានរត់គេចខ្លួនបាត់ស្រមោល ក្រោយពេលកើតហេតុ ហើយសមត្ថកិច្ចបានត្រឹមតែ ចុះទៅវាស់វែងដើម្បីកសាងសំណុំរឿង ទុកដោះស្រាយតែប៉ុណ្ណោះ៕
