មានការចែកចាយនិងបង្ហាញរូបភាពរបស់ទារិកាម្នាក់នៅប៉េរូដែលកើតមកមានជើងជាប់គ្នាដូចនាងមច្ឆាក្នុងរឿងព្រេង។ រូបភាពមួយសន្លឹករបស់នាងបានធ្វើឲ្យមានការចាប់អារម្មណ៍យ៉ាងខ្លាំងនិងមានអ្នកចុចLike Comment និងShareយ៉ាងច្រើនបំផុត។
ស្របពេលនឹងការចាប់អារម្មណ៍ពីសំណាក់អ្នកប្រើប្រាស់បណ្ដាញទំនាក់ទំនងសង្គមជាពិសេសFacebookនោះ មានជនមួយចំនួនបានប្រើប្រាស់រូបភាពនេះដោយមានសរសេរថា “គេហទំព័រCNN និងFacebookនឹងជួយឧបត្ថម្ភថវិកាពាក់កណ្ដាលសម្រាប់ការវះកាត់ទារិកានេះដោយសារតែម្ដាយឪពុករបស់ទារិកាកម្សត់នេះគ្មានលទ្ធភាពគ្រប់គ្រាន់។ ដូចនេះសូមកុំព្រងើយកន្តើយ សូមជួយចែកចាយទៅកាន់ពិភពលោកផង”។
ក្នុងសារដែលសរសេរពីលើរូបភាពនោះក៏បានបញ្ជាក់ថា ៖
1 Like = 20$
1 comment = 50$
1 share = 100$
រូបថតនោះត្រូវបានថតតាំងពីឆ្នាំ២០០៥ ហើយគិតមកដល់ពេលនេះទារិកាខាងលើក៏មានអាយុ៩ឆ្នាំនិងបានទទួលការវះកាត់រួចផងដែរ។ ប៉ុន្តែគ្មានប្រភពណាច្បាស់លាស់ដែលអាចបញ្ជាក់ថាការសរសេរអះអាងថាCNN និងFacebookបានចេញថ្លៃវះកាត់សម្រាប់ក្មេងស្រីនោះតាមចំនួនLike Comment និងShareនោះដែរ។
គេជឿជាក់ថាការដែលគេសរសេរបែបនេះគឺគ្រាន់តែចង់ទាក់ទាញចំណាប់អារម្មណ៍ក្នុងFacebookកាន់តែច្រើនដើម្បីគោលបំណងរកផលចំណេញផ្សេងតែប៉ុណ្ណោះ។ ដូចនេះការដែលបង្ហោះមួយចំនួនមិនគួរជឿពេកទេណាnob70ទាំងអស់គ្នាព្រោះវាអាចនាំឲ្យមានការភ័ន្តច្រឡំកាន់តែខ្លាំងឡើង។
