នាយកក្លឹប Barcelona លោក Rosell បានលាលែងពីតំណែងដោយសារលទ្ធផលនៃការសម្រេចរបស់តុលាការអេស្ប៉ាញដើម្បីស៊ើបអង្កេតការចុះហត្ថលេខាយកខ្សែប្រយុទ្ធ Neymar មកពីប្រេស៊ីលកាលពីឆ្នាំទៅ។
“ក្លឹបកាន់តែជោគជ័យ ផលលំបាកក៏មានច្រើនដូចគ្នាសម្រាប់ខ្ញុំនិងគ្រួសារ” លោក Rosell មានប្រសាសន៍ក្រោយកិច្ចប្រជុំគណៈកម្មការដែលរៀបចំដោយក្លឹបម្ចាស់ជើងឯកអេស្ប៉ាញ។
“មានកត្តាគំរាមកំហែង និងការចោទប្រកាន់ដែលធ្វើឱ្យអ្នកគិតដល់តំណែងរបស់អ្នក រាប់បញ្ចូលទាំងការអះអាងនៃការរៀបចំហិរញ្ញវត្ថុមិនសមរម្យ និងក្ដីនៅតុលាការ។ ខ្ញុំតែងតែបញ្ជាក់ច្បាស់ថា យើងបានធ្វើយ៉ាងត្រឹមត្រូវក្នុងការផ្ទេរយក Neymar”។
Rosell បន្តថា នាយករងលោក Josep Maria Bartomeu នឹងជំនួសតំណែងរបស់លោកជា នាយកក្លឹប Barca រហូតដល់តំណែងនាយករបស់លោកផុតកំណត់នៅក្នុងរយៈពេល២ឆ្នាំទៀត។
ចៅក្រម Pablo Ruz បានចេញដីការឱ្យធ្វើការស៊ើបអង្កេតកាលពីថ្ងៃពុធលើក្លឹប Barcelona ពីបទរៀបចំហិរញ្ញវត្ថុមិនត្រឹមត្រូវក្នុងការចុះកិច្ចសន្យាជាមួយ Neymar ដោយបញ្ជាក់ថា លោក Rosell អាចនឹងត្រូវកោះហៅមកបង្ហាញភស្ដុតាង៕
ដោយ nob70
ប្រភពពី៖ www.nob70.com
